قوستانايدا «قۇقىقتىق ءدارىحانا» الەۋمەتتىك جوباسى باستالدى. «زاڭ مەن ءتارتىپ» قاعيداتىن ىلگەرىلەتۋ ماقساتىندا قولعا الىنعان جوبانى پروكۋراتۋرا مەن قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتتىڭ وبلىستاعى دەپارتامەنتى ۇيىمداستىرىپ وتىر, دەپ جازادى Egemen.kz.
جوبانىڭ العاشقى كۇنى «Mart» ساۋدا-ويىن-ساۋىق ورتالىعىندا زاڭ ماماندارى تۇرعىندارعا قۇقىقتىق ماسەلەلەر بويىنشا كەڭەس بەردى, «e-Otinish» اقپاراتتىق جۇيەسى ارقىلى وتىنىشتەردى قاراۋ ءتارتىبىن ءتۇسىندىردى.
سونىمەن قاتار باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى كورسەتەتىن مەملەكەتتىك قىزمەتتەر تۋرالى اقپاراتتىق بۋكلەتتەر تاراتتى.
جوبانىڭ ماقساتى – ازاماتتارعا, اسىرەسە مەملەكەتتىك ورگاندارعا سيرەك جۇگىنەتىن نەمەسە قۇقىقتىق كومەككە ءزارۋ ادامدارعا قولداۋ كورسەتۋ.
ءىس-شارا شەڭبەرىندە پروكۋرورلار حالىق ءجيى كەزدەسەتىن قۇقىقتىق ماسەلەلەر تۋرالى دەرەك جينايدى جانە ونى تالدايدى.
«بۇل بىزگە كۇرمەۋلى ماسەلەلەردى انىقتاۋعا جانە ولاردى شەشۋدىڭ ءتيىمدى جولدارىن قاراستىرۋعا كومەكتەسەدى», دەيدى وبلىستىق پروكۋراتۋرانىڭ وكىلدەرى.
قوستاناي وبلىسى